اسلام آباد۔2دسمبر(اے پی پی) پاکستان دا بھارت دے غیر قانونی طور تے زیر قبضہ جموں و کشمیر اچ انسانی حقوق دیاں سنگین پامالیاں تے بھارت اچ اقلیتاں نال روا رکھے ونڄݨ آلے غیر انسانی سلوک تے گہری تشویش دا اظہارکیتے ، افغانستان اچ امن و استحکام پاکستان دے مفاد وچ اے ، پاکستان تے ترکیہ تجارتی تے اقتصادی رابطے ودھاوݨ تے سٹریٹجک ڈائیلاگ اتے دفاعی تعاون کوں مضبوط بݨاوݨ تے اتفاق کیتے ۔ ترجمان دفتر خارجہ ممتاز زہرہ بلوچ جمعہ کوں پریس بریفنگ اچ آکھیے جو وزیر اعظم محمد شہباز شریف 25 توں 26 نومبر تئیں ترکیہ دا دورہ کیتا ہئی ایں دورے دی دعوت انہاں کوں ترک صدر رجب طیب اردگان ݙتی ہئی ۔ استنبول اچ وزیراعظم ترکیہ دے صدر دے نال ون آن ون اتے وفد دی سطح تے ڳالھ مہاڑ کیتی ۔ ترجمان آکھیے جو ݙوہیں رہنماواں ݙو طرفہ تعلقات کوں مزید ودھاوݨ ، تجارتی تے اقتصادی رابطے ودھاوݨ تے سٹریٹجک ڈائیلاگ اتے دفاعی تعاون کوں مضبوط بݨاوݨ تے اتفاق کیتے ، انہاں توانائی تے رابطے دے منصوبیں تے ڳالھ کیتی ۔ وزیراعظم دورہ دے دوران پاکستان اچ سرمایہ کاری دے موقع دے حوالے نال ترکیہ دے سرمایہ کاراں کوں ݙسایا تے ایں اعتماد دا اظہار کیتے جو ہݨے ہی ٹریڈ اینڈ گڈز معاہدہ تے دستخط نال ݙو طرفہ تجارت دے حجم کوں ودھاوݨ اچ مدد ملسی ۔ ترجمان آکھیے جو وزیر مملکت خارجہ امور حنا ربانی کھر 29 نومبر کوں افغانستان دا ھک ݙینھ دا دورہ کیتے ، کابل اچ انہاں قائم مقام وزیر خارجہ امیر خان متقی، نائب وزیر اعظم عبدالسلام حنفی اتے افغان عبوری حکومت دے ٻئے عہدیداراں نال ملاقاتاں کیتن ۔ دورے اچ انہاں تعلیم، صحت، زراعت، تجارت اتے سرمایہ کاری دے علاوہ علاقائی تے عوامی رابطے تے سماجی و اقتصادی منصوبوں سودھے ٻہوں سارے ݙو پاسے امور تے ڳالھ مہاڑ کیتی ۔ ترجمان آکھیے جو حنا ربانی کھر دے دورہ دے دوران علاقائی سلامتی متعلق امور تے وی ڳالھ مہاڑ کیتی ڳئی ۔ ترجمان مزید آکھیے جو وزیر مملکت امور خارجہ دورے دے دوران ھک پرامن، خوشحال، مستحکم اتے منسلک افغانستان کیتے پاکستان دے عزم دااعادہ کیتے ۔ ترجمان دفتر خارجہ آکھیے جو فریقین علاقائی رابطے کوں ودھاوݨ بارے ھکو سویں ڳالھ کیتی جیں اچ کاسا 1000 اتے تاپی گیس پائپ لائن جیہے منصوبے شامل ہن ۔
